【記者胡仲邦報道】18歲自閉症青年被CaliforniaFitness高壓推銷逾兩小時，為脫身被迫簽卡1.8萬元，購買會籍及教練課程，家人要求退款被拒。
曾太的兒子阿樂自小患自閉症，智力正常，與人溝通有困難，「上年會考考評局都豁免佢考中英文口試」。4月2日阿樂凌晨才回家，神色有異，「平時9點就返，嗰日番到嚟揸住張單張，話畀人迫簽咗成兩萬蚊卡數入會健身，佢做洗碗賺得幾千蚊一個月，返工半年儲咗啲錢，咁就畀健身中心攞走晒」。
CaliforniaFitness拒退款
阿樂向記者講述事件時顯得非常緊張，「有人同我講中咗獎帶我上健身中心，話要核對資料拎咗我張身份證，跟住就話做完問卷一定要入會。佢哋唔畀我走，好大聲罵我『唔簽名咁入嚟做乜？』坐咗兩個鐘等到成11點，我好想走先畀錢」。
曾太要求健身中心取消合約及退款，對方以阿樂已成年並簽約，家長不能代他取消會籍。CaliforniaFitness回覆，推銷服務期間客人可隨意離開，又否認取走阿樂身份證，更強調不會拒患病客人入會，否則構成歧視。
香港自閉症聯盟主席余秀螢指健身中心講法不合理，「唔畀殘疾人士用健身設施係歧視，不過用不良銷售手法欺壓心智不成熟或行為能力有限制嘅人係違反社會公義」。他指自閉人士的溝通及表達能力較弱，面對不良銷售會處劣勢，該會也有收過類似投訴，促政府盡快就預繳式消費設立合約冷靜期。