無綫劇集《雷霆掃毒》一眾演員林峯、徐子珊、苗僑偉和歐陽靖等，昨日於電視城出席拜神儀式。林峯透露近日有不少朋友為他介紹女友，不過他忙到沒時間出席飯局。
新劇《雷霆掃毒》演員昨日齊集將軍澳電視城出席拜神儀式，林峯表示劇中有不少動作場面，幸沒觸及舊患，他說：「我開劇中途去咗澳洲開巡迴，下個月又喺澳門開，同埋預計出年1月會再開，所以我一直keepfit，只要練好腹背肌就OK。」林峯指早前發福不少，故開劇時要急減十磅：「大家睇呢套劇時可能見到我時肥時瘦，前排真係肥到自己都頂唔順。」
鍾情圈外人
問到感情生活狀況？林峯即扯開話題說：「劇入邊同子珊一齊，其實好多朋友都話介紹女仔畀我識，但係我忙到連食飯見面都冇時間。」林峯希望將來的女友是圈外人。問他是否因上次與潘霜霜拍拖有不快經歷，故想結識圈外人？他說：「唔關事，因為呢行成日都係拍嘢，好多行業嘅嘢都唔識，如果係一個行外人，可以教識我其他嘢。」
徐子珊強調沒有介紹女性朋友給林峯，笑言有人介紹男性給她認識的話亦無任歡迎：「有介紹話畀我知呀，等我mark實呀，我嘅條件係要好人、高過我同埋最好收入都高過我，咁樣就可以照顧埋我，我份人比較現實。」
子珊拒愛林峯
當記者指林峯符合她所有條件，子珊即拒絕說：「唔得㗎，佢係我阿哥，絕對同佢談唔上男女感情，個感覺好怪，同埋我唔係咁想揀圈中人。」
採訪：李珮洳 攝影：陳慧安