張智霖（Chilam）和袁詠儀（靚靚）鮮有夫妻檔一齊出席美容活動，昨日靚靚與Chilam出席活動時，踢爆白淨老公最怕美白護膚品，平日其實求其又烏歪，舊底衫着足幾年又黃又灰，更會穿睡衣出街，不過靚靚會努力督促老公變型，因為Chilam有型靚仔，才搵到錢養家。
張智霖和袁詠儀昨日夫妻檔在又一城為護膚品Lancome宣傳新品，出席的周嘉玲白色上衣透視，追問她是否真空時即大發晦氣；AliceB.自認肥了三公斤，上圍升了級。
關係酬勞都好
Chilam兩公婆情侶檔黑白配，表現恩愛，Chilam又幫老婆揸咪，兩人直認酬勞好：「同品牌好好朋友，價錢都好好，所以咪一齊出嚟。」靚靚又大爆老公婆媽護膚心得，她說：「佢最怕美白，一話會變白佢就唔用。」Chilam自言在澳洲打扮隨意，穿睡衣出街也可以，靚靚即爆老公十分烏歪。
靚靚說：「佢底衫又黃又灰，求其冚件外套就出街，一件底衫可以着五、六年，只要我出咗埠，佢可以幾日唔換衫。」Chilam在旁忍不住笑：「喺佢監管下，我先係一個明星。」靚靚也回敬說：「佢型我先有飯食，唔使食自己，可以食老公。」
陳法蓉講娟妹
同場的陳法蓉對好友羅慧娟被傳病重入院，她否認說：「大家唔使擔心，成個傳聞都係假嘅，佢唔喺醫院，我每日都同娟妹視像或者通電，唔係外面咁講。」
陳法蓉指羅慧娟沒叫她代為澄清，但她不想外界亂估：「佢精神好好，大家唔好胡思亂想，我有見過佢，雖然呢幾日冇見，但佢行行企企、刷牙食飯都可以視像見到，多謝大家關心。」她表示自己最清楚娟妹近況，着大家不用猜度，又着外界祝福好友朱茵。
此外，前日傍晚Chilam在中環皇后大道中泊車等人，只見他面容浮腫，果然是靚靚口中的不似明星；近年養尊處優的關之琳剛巧在附近路過，架着墨鏡的她施施然上車，星味依然。
採訪：盧妹、梁繼光
攝影：黃偉雄、梁繼光
