上星期五，利豐喺五份報紙賣全版廣告（圖）。不過呢間利豐係叫做利豐瓷莊，乜冇聽聞馮氏兄弟間利豐（494）有搞陶瓷嘅？睇真啲，呢間利豐瓷莊英文名係LEEFUNGCHINAWARE，上市嗰間就叫Li&Fung。賣廣告呢間利豐瓷莊，分分鐘惹上官非。
上市公司利豐上周三（18日）入稟高院，狀告「香港利豐旅遊開發有限公司」，全因利豐呢兩隻字係俾上市公司註冊咗，所以利豐要告香港利豐旅遊開發侵犯註冊商標，唔用得「利豐」兩個字。華華都有啲擔心「利豐瓷莊」會有同一遭遇。
根據公司註冊處資料，利豐瓷莊班董事入面，華華一個都唔識，亦冇人姓馮，照計同494冇乜關係。睇番個廣告，利豐瓷莊有句「Since1953」，同494母公司「利豐（1937）」又真係有幾分似，只係爭咗16年！