羅拔唐尼（RobertDowneyJr.）主演嘅著名科幻電影《鐵甲奇俠》（Ironman）嚟緊會拍第三集，今次係中美合作，嚟緊嘅夏天就會開拍。
片酬未傾掂
繼日前盛傳范冰冰有份演出之外，噚日又有網站爆料，話香港電影金像獎出爐影帝劉德華都有撈番一個角色，家陣已經傾到七七八八，差在片酬問題喎。咦！又劉華又范冰冰又科幻片，咁咪即係王晶套《未來警察》續集？
唔會做奸角
講番正經嘢，有睇過《鐵甲奇俠》漫畫嘅fans，都知道有個大奸角叫TheMandarin，係中國軍閥，十隻手指都戴住魔法戒指，成日話要用古代法術征服地球。唔通劉華會飾演呢位大反派？不過劉華喺內地咁多fans，叫佢扮奸梗係冇可能啦，何況賓京士利（BenKingsley）同佳皮雅斯（GuyPearce）已經落實會演大反派。
咁劉華個角色會係乜？爆料網站就話佢會扮演羅拔唐尼飾演嘅主角東尼史達（TonyStark）個老死，拍住檔一齊打壞人，又話由於中方有份出錢投資，斷估華仔都唔會喺戲入面行行企企嘅，應該有得發揮。
