全城搵緊下一隻高危爆煲民企。香精股華寶（336）舊年曾經俾澳洲對冲基金撰文唱衰，加上佢3月底先截數，仲未公佈得業績，一有咩風吹草動大家即時心慌。
上星期華寶股價無端端下跌，傳聞四起，海迪聞說華寶昨日朝早9點就搞咗個投資者電話會議，表明有信心6月底前可以公佈到業績，一切業務正常，支持股價逆市升返0.7%。
海迪份人比較悲觀，對於太過美好的事物通常有啲保留。雨潤（1068）利潤率長期高過同業一截，舊年神話就咁爆咗。
中國動向（3818）上市時都俾芬佬質點解純利率可以高至40%，係李寧（2331）嘅一倍，而近年事實證明呢個水平係唔多sustainable。
高利潤率業務嘅吸引力，往往在於其伴隨着的槓桿效應，銷售升少少，盈利升幅已經好和味。但係咁高的利潤率，背後要好多嘢支持，例如LVMH嘅品牌效應，就無人夠膽質疑。
華寶早年純利率長期超過50%，老實講，仲高過好多用香精嘅客仔，市場已經估今年公司利潤率要急跌。加上大股東又有同投行簽衍生產品合約，又無解釋清楚。
透明度低嘅公司，喺家嘅市況，投資者真係要諗清楚。