熱刺孖寶亮相愉景灣！唔係講加里夫巴利同雲達華治，而係廿年前白鹿徑雙煞舒寧咸同安達頓，佢哋今次唔係去大嶼山度假，而係效力一支叫愉景灣嘅球隊，下個月喺香港踢7人賽。
一年一度嘅國際7人足球賽，下個月18至20日照舊喺港會場舉行；前年邀請過曼聯「黑雙煞」之一嘅高爾孭飛，點知佢落場兩分鐘就同人講手，老馬有火。所以話，有時老餅波都幾好睇㗎。今年老餅波繼續舉行，仲邀請另一位曼聯「3冠王」功臣舒寧咸孭飛，佢同前熱刺隊友安達頓故劍重逢，代表愉景灣喺A組大戰阿積士明星隊。
舒寧咸再拍安達頓爭盃
我求大俠噚日同賽會主席布東尼吹水，佢話舒寧咸雖然已經46歲，但佢喺英國仲有踢衞生波，狀態一啲都唔差。至於齊頭40歲嘅安達頓，喺熱刺期間冇同舒寧咸一齊攞過重要錦標，最威99年熱刺捧聯賽盃時，舒寧咸亦已轉會曼聯。不過，兩人喺98世界盃期間曾經合作，當年由荷杜帶領嘅英格蘭，仲被譽為係近年最勁嘅「三獅兵團」。呢對前熱刺孖寶再度合作，又睇下可唔可以幫愉景灣捧盃。
傑志衞冕撞正車路士
除咗老餅波外，由牛奶嘴角逐嘅主賽，車路士相隔12年再次派隊，唔好睇佢哋派預備組嚟，呢支殺入今屆青年足總盃決賽嘅球隊，估計係16支參賽球隊中實力最強嘅一隊。經噚日抽籤後，車路士同衞冕嘅傑志被編入C組；不過，由於賽期撞正港甲聯賽煞科，傑志講明唔會派強陣喎！
除車仔外，今季喺英超有超水準嘅紐卡素會歷史性派隊參賽，雖然未知係青年軍或預備組，但同組（D組）有7人賽常客維拉；贏過5屆冠軍嘅維拉，歷來帶過唔少明日之星訪港，好似01年嘅安頓費迪南、06年嘅艾邦拉荷同兩年前嘅班倫等（見附表）。一連3日賽事除首天免費外，其餘兩日套票$200；門票現已在快達票有售。
