南華前日喺聯賽重創天水圍飛馬，賽後有網友留言，話復任正選嘅南華隊長李海強下半場中後段被換出場時先撥開助教，拒絕握手，仲將波衫掟在地上。南華足主羅傑承噚晚亦喺blog度回應，話冇目擊呢一幕，如果真有其事，就難以接受，因為掟球衣屬非常不尊重球會行為。
求大俠睇番比賽片段，強哥被換出時的確好似網友所講，冇握手兼掟衫，睇嚟難得踢正選嘅強哥對被換出確有唔少怨氣。求大俠事後問過呢位位兩屆足球先生點解咁多怨氣，佢只係話：「教練（高世安）點排陣，同幾時換出球員，有佢嘅睇法，其他嘅嘢，留番球季完咗先講。」
34歲嘅強哥上季尾獲傑志招手，但最後都留低，點知做咗大後備；前日突然正選，踢得唔錯又被換出，仲搞到有手尾跟，隨時被球會處分，都幾無奈。