無綫《盛女愛作戰》掀起全城熱話，就連商台節目《光明頂》亦連續七晚做盛女，搞到唔少聽眾同網民不滿。有傳主持陶傑喺節目唔多出聲，好似好唔like班盛女同專家，而上星期五陶傑請假冇做節目，令人覺得佢係避咗班盛女㖭。
陶傑無奈
陶傑噚日強調一早因事請假：「呢啲成日都有，唔通365日日日開工咩？我唔係不滿走咗去。」講到做節目少出聲，佢解釋：「好多晚成五、六個人，我唔可以霸住個咪有我講冇人講。」對於網民鬧爆《光明頂》做盛女，佢就話：「我冇意見，呢個係公司決策，陳總（指陳志雲）嘅安排，呢個係一個電台，傳媒要時時試吓革新，有啲變化。當然好多人聽《光明頂》聽咗咁多年，習慣咗某一種風格，唔同咗梗係有少少唔適應。」
寸爆Santino
另外，同《盛女》兩性關係導師Santino反咗面嘅拍檔Norris，噚日接受DBC數碼電台訪問時爆《盛女》做媒：「同Bonnie配對嘅阿Wood同Roxwell都係我學生，根本咪同一班人！Gobby嗰個醬油男係我助教，咪又係媒！唔可以將偽新聞做特輯，真人騷變滾人騷。」
講到開班教人召妓嘅Santino涉嫌做過男公關搵女人錢，Norris寸爆舊拍檔：「佢成日出席speeddating，我期指都搵得多過佢。」但以Norris五呎高嘅身形，做男公關似乎好「抆」水喎。《盛女》上星期播完十集，平均收視25點（約160萬觀眾）。而通訊事務管理局截至噚日收到137宗有關《盛女》投訴，不滿節目介紹尋找伴侶途徑嘅內容、節目意識不良、有歧視同廣告成份。
