記者小Ｇ係巴塞隆拿擁躉，對巴塞重奪2012年歐聯冠軍，好有信心，在四強抽籤，巴塞對住車路士，皇馬對拜仁慕尼黑，小Ｇ一早就講：「決賽會係巴塞對皇馬，巴塞攞冠軍。」故此上星期三就講定：「明日凌晨巴塞贏車路士啦！」左丁山本來同意嘅，但睇吓賠率，車路士主勝竟然有4.9倍，咁大吸引？唔啱球隊實力比例喎，一於買車仔，小Ｇ猛話唔制，堅決捧巴塞。
騎騎，果然車仔贏咗一比零，小Ｇ為巴塞不值：「全場佔盡上風，射門無數，車仔只係射一次就入波，巴塞真係冇運。」足球就是這樣的，巴塞控球比率高達72%，成功傳球782次，車仔只得194次，圍住車仔嚟攻，好似係英超曼聯對布力般流浪，但車仔呢位臨時領隊迪馬提奧係意大利人，天性喜歡防守與穩守突擊，前鋒只打一個步大力雄嘅杜奧巴，做主隊都全場力守，進攻中場好波之人馬達竟然在九十分鐘內只得七次接觸皮球，你話守得幾辛苦！卒之車仔戰術奏效，第一回合領先，明早三時在巴塞主場魯營舉行，巴塞能否反先？
巴塞在魯營威力零舍唔同，美斯如魚得水，按道理可以攻入兩至三球，踢走車路士，但左丁山今次仍然扒逆水，捧車路士出線。理由有幾個：（一）車仔必然繼續穩守突擊，全場死守，希望杜奧巴照辦煮碗，射入一個作客入球，巴塞就要射入三球先至可以出線，有難度㗎！（二）車仔還有一招，可以派埋費托配搭杜奧巴，牽制巴塞三至四個後防唔敢上前助攻，費托過往踢馬體會，對住巴塞零舍精神，係車仔秘密武器：（三）車仔在上星期六中午倫敦時間對阿仙奴，派八個「副選」上陣，悶和○比○；巴塞在晚上對皇馬，精英盡出，仍輸一比二，巴塞更加消耗體力，對車仔略為有利，（四）過往巴塞對車仔，從未大勝，今場仲要零失球，講機率都要捧車仔。
論實力，巴塞當然勝一籌，但車仔班老將經驗豐富，鬥志壓一，有首場領先之利，未必輸得晒，如果有得買，左丁山會落注車仔和波或輸一球而出線踢決賽。車仔對皇馬，摩連奴一定感覺良好！