夏佳理噚日正式卸任港交所（388）主席，主持佢任內最後一次股東周年大會，好多股東都喺會上感謝夏佳理呢六年嚟嘅貢獻。呢邊廂「前主席」大受股東歡迎，但CEO李小加（Charles）就俾股東大彈表現差，冇做好份內工作，李總裁亦唔示弱，寸嘴叫股東做好研究，再慢慢同佢傾。
噚日有位自稱喺證券界打滾42年嘅退休阿叔，大讚夏佳理有領導才能，話鋒一轉，就勁彈李小加，「阿Charles，我資歷大過你，請容許我咁叫你，香港經歷過咁多風雨，好似67年暴動、97年金融風暴、我都冇擔心過香港股市，但呢兩年咁多民企風暴，造假數，我真係好擔心，公司個股價表現又咁差！」
股東追擊 CEO唔耐煩
Charles就話，冇人比佢更關心港交所股價，「我上午回公司又看，中午食飯又看，下班又看，有大行出報告又看，我知道一間公司股價是反映CEO的表現。」可能Charles答完等如冇答，另一位股東忍唔住加把嘴，話港交所延長交易時間，反而令成交量下跌，影響公司盈利表現。
呢個時候，Charles反擊了，佢語氣就好寸咁話：「我不覺得交易時間和成交易有因果關係，如果有研究報告說交易時間短，成交量反而高，我會考慮去改。」個股東繼續追問，Charles就唔多耐煩，「如果你想單獨談，可以遲些慢慢談，如果你想將對話公開，也可以現在繼續談！」
會後夏佳理冇火上加油，佢只係話對新主席充滿信心，但就唔肯賣關子透露係咪由周松崗接任。雖然股東會通過咗授權董事會發10%新股嘅議案，但佢就唔回應，集資係咪為咗收購倫敦金屬交易所，仲叫華華遲啲問新主席喎！
李華華
mailto:[email protected]