鍾楚紅近年醉心環保推廣活動，未有意思開始新感情，紅姑更寄語梁振英上場後的新政府多關注環保問題，要立法保護，不可亂斬樹。紅姑更謂最要關心水與電力節制的議題，她冲凉都特別快，更大鬧商場冷氣凍死人。
鍾楚紅前晚捧達明一派演唱會場，昨日早上一身卡其服，精神奕奕現身元朗大棠的植樹活動。一向熱切關注環保公益活動的紅姑，笑言八年前在同地植樹，故不時帶朋友來探望。問紅姑對於環保的看法，她說：「要關注水同電力節制嘅問題，我冲凉都會快啲，用花灑同提醒自己唔好浪費，平時買食物都係幫襯本地有機農場，少食啲由外地運返嚟嘅食物，幾個人夾埋先坐一架車。」
「點解亂斬樹」
紅姑續說：「就係空氣唔好先咁多人哮喘，冷氣議題都要講吓，商場冷氣開得咁行，有溫室效應，好冇人道嘅做法，凍死人，身體應該處於22、23度先最舒服」
不吐不快的紅姑，更表示對曾蔭權的政府失望：「希望下一屆政府積極處理問題，唔好好似上一屆，樹木要長大成林，要好耐，更覺得植樹護樹嘅重要，點解有人忍心斬樹，政府應該立法保護。」
唔諗第二春
問到適值春天，是散播種子的時候，自己會否有意找第二春，紅姑笑說：「成日都問呢啲，都冇諗。」記者問到追求者是否都要支持環保，她說：「係，環保好，慳啲嘛，唔使送禮，我剩係要乾淨空氣同水就得。」問會否邀請環保異性好友參加活動，她說：「我好多環保活動，周圍都有異性朋友，都冇諗。」
採訪：盧妹 攝影：葉君海
