舊年金融業畀歐債拖後腿，資源企業就上位成功。據《福布斯》上星期公佈最新全球2000大企業排名，油企埃克森美孚（ExxonMobil）取代摩根大通，躍升全球最大公司。中國就有136家公司上榜。
排行榜中，有4間內銀位列全球21大企業，當中工商銀行（1398）最巴閉，躍升兩級排名第五。除咗工行，同樣有喺本港上市嘅滙控（005）同中石油（857）分別排第六同第七名。數咗咁耐，都唔見舊年出盡風頭嘅蘋果嘅？由於福布斯呢個排名綜合多項指標，雖然蘋果市值同利潤分別排第一同第二，但佢資產值大幅落後，只能夠排第22位咋。