踢阿仙奴等於冇盃捧，搞到法比加斯、拿斯尼等都以相似理由離隊；今季阿仙奴亦都已經四大皆空，好彩隊長尹佩斯都總算有啲嘢落袋，大熱當選英格蘭球員工會（PFA）互選產生嘅「球員先生」。不過尹佩斯嘅英超神射手位置俾朗尼力追，來季又盛傳離隊，唔通呢個喺佢身為兵工廠球員最後一獎？
神射手受朗尼力逼
球員先生由工會各會員投票互選產生，所以講球技外，球品和球場內外行為都好緊要，28歲嘅尹佩斯壓過朗尼、阿古路等得獎，領獎時都好謙虛咁講：「其他人讚你係最佳，已經唔容易，更何況稱讚你嘅，仲要喺你對手。呢個獎好特別，每星期不斷地與佢哋交手，如果獲得佢哋承認最佳，係一個莫大榮譽。」
雲格04年收購尹佩斯，咁多年嚟都只贏過一次英足盃冠軍，今季起接替法比加斯出任隊長，但同兵工廠續約仲係僵局；巴塞隆拿、曼城都想利誘佢過檔，下季仲會唔會步法比仔後塵離隊，都仲係未知數。好彩尹佩斯亦都澄清早前到酒店同巴塞中場阿費利會面，絕非傾談轉會。
好嘞，我求大俠信住你尹佩斯唔走，不過呀尹生你仲有另一個任務，就係保住嗰英超神射手獎；事關尹佩斯腳風冇之前咁順，近6場都只係對狼隊入一粒；相反朗尼噚日對愛華頓就入兩粒，已經累積26球，落後尹佩斯一球，隨時大逆轉，等尹佩斯諗住袋硬嘅金靴獎，都要嘔番出嚟！
同日PFA都有其他獎，熱刺右後衞基爾獲加，就成為最佳年青球員；而今季最佳陣容，曼城就最威，大衛施華、耶耶托尼、高柏尼同赫特4人入圍，熱刺都有3人入選（見附表）。