內地網購嘅競爭已到臨界點，華華絕對唔係吹水，皆因連行內一哥淘寶網都要出奇招搶生意。據內地傳媒報道，淘寶網籌備緊一間由「淘女郎」配送網購貨物嘅快遞公司，聽講公司內部已經開始全國招募。
所謂「淘女郎快遞」，即係消費者喺淘寶網買嘢嘅同時，可以選擇同城市指定嘅淘女郎親身送貨，當然，選擇淘女郎送貨，物流費要比正常價多出幾十蚊。據消息人士話，淘寶網安排淘女郎送快遞呢個想法由來已久，早前淘寶網母公司阿里巴巴集團一名高層就喺微博爆料：「淘寶正在與一家快遞公司合作淘女郎快遞。」
本身專責示範網購產品嘅淘女郎，家已經超過4萬人，分散喺全國各地。淘女郎快遞噱頭就有喇，但華華想問，如果有用家同淘女郎利用呢個平台做不道德交易，責任邊個負呢？如果淘女郎送貨途中有乜危險，又係邊個負責呢？