候任特首梁振英CY雖然仲未「登基」，但發展商就嚟冇大茶飯食嘅講法就言之鑿鑿，中小型發展商英皇國際（163）執董張炳強（洋名Donald）就力撐CY上場之後，樓市仲可以審慎睇好，佢仲自爆自己同CY係同門師兄弟關係。
Donald話佢同CY當年都係理工學院建築測量系嘅書友仔，不過CY就大佢一年，係佢師兄。雖然CY早一屆畢業兼赴英留學，但Donald之後幾年仲有同CY書信來往，信中提及好多嘢，乜都會講一餐咁話。
CY家仲有冇同Donald有書信聯繫華華就唔知，但Donald就信得過CY喺地產界做咗咁多年，都知地產市場係香港重要經濟支柱，唔想樓價突然間大冧。
但身為發展商，佢哋都係希望樓市平穩之餘，政府仲會繼續拎地皮出嚟賣。咁又係，冇地起樓，又邊有得搵銀？