有金融沙皇之稱嘅白頭任（任志剛），上月幫完唐唐競選特首後，孭住背囊去咗日本名古屋賞櫻，心情靚靚嘅白頭任日前已回港，佢同華華講非常忙碌，因為又要馬不停蹄，準備授課，8月底幫中文大學全球經濟及金融研究所主講第3屆全球金融菁精領導研討班。
沙皇主講嘅題目係「香港貨幣體制的未來」，當前人民幣國際化加快步伐，港元未來何去何從，身為聯繫滙率設計師之一嘅白頭任，授課有無勁料到，華華姑且喺度賣個關子。
佢又話，另一重量級授課嘉賓，乃中銀監前主席劉明康。退休後嘅「M.K」劉教授，常來港曝光，上周出席中國政經論壇，仲呼籲小心內房債出事㖭。劉明康舊年退休，出任內地中山大學嶺南學院名譽院長，跟住做埋中大全球經濟及金融研究所傑出研究員，即係同白頭任個名銜一樣。