工銀亞洲喺今個月10號正式啟動咗個新IT系統，電腦「升呢」本應開心，但就惹嚟員工不滿。
有個資深職員就同華華呻，話工銀為咗配合呢個新系統上線，全體分行員工都要強制銷假，連續4日復活節長假要喺工作中渡過。而令佢成肚火嘅係，銀行要夾硬套用所謂「先進」嘅母行工商銀行（1398）系統，但後台全部都係簡體內地用字，又冇英文或繁體版本。而母行負責支援嘅同事，喺工作效率、思維文化上同佢哋有好大差異，合作有困難。
喺香港呢邊，要包辦本地化工序嘅分行，就苦無中心部門協調，部門之間分工又唔明確，欠缺溝通，搞到同事之間產生好多磨擦同怨言，聽講有啲舊員工已經辭職。佢話唔係銀行待遇差，但喺呢間行做咗幾十年，幾經改朝換面，第一次感到銀行處於咁混亂嘅狀態，佢好擔心之後仲會有無數問題跟住嚟。
華華搵到工銀亞洲副行政總裁馮兆明問吓，佢好大方咁承認同事確為整合IT系統而加班，辛苦咗一段長時間，但選擇今個月長假期做，係為咗減少騷擾客戶嘅時間，以及經金管局安排。工行系統正進行全球化一體化嘅策略，佢話技術先進過香港，香港已經花咗3年時間進行本地化㗎。
按法例補假兼補水
馮生坦言銀行流失率係高，但希望同事可以睇得遠啲，捱過呢仗嘅同事，日後際遇同今日嘅付出係成正比！而銀行今次已按勞工法例補假補水，有份參與嘅同事之後都會論功行賞咁話。但今次獎金會唔會多過年初嗰陣全體皆有嘅6000蚊呢？咁馮生就冇透露。
李華華
mailto:[email protected]