TVB《盛女愛作戰》成為全城熱話，除咗收視大升，電視廣播（511）股價近日都升到近五年新高，好似噚日個市跌成400點，TVB就逆市上升，一度升到55元，收報53.65元。55元唔只係近五年新高咁簡單（其實都唔簡單），更重要係當年「殼王」陳國強、王雪紅同基金公司嘅入貨價。
港交所（388）資料顯示，殼王舊年首次申報持有TVB，每股作價就係55元，即係短短年幾，當日殼王20%溢價嘅入股作價，今日已經到價。
唔好忘記，呢段日子，邵逸夫同方逸華相繼離開領導層，就連主意多多嘅陳志雲都走埋，加上近日魔童豪賣電訊資產，準備同TVB死過，而且市傳今日政府發出三張免費電視牌，樣樣都係負面消息，TVB都要升成咁，只能講殼王唔係浪得虛名。