《時代周刊》上星期公佈今年全球百大最有影響力人物，除咗奧巴馬、林書豪等入榜，仲有一低調香港人，年逾70歲的陳麗華上榜。相信唔少港人未聽過陳麗華個名，更唔知佢嘅影響力從何而來。這類排名榜，噱頭居多，時代點解會揀到陳麗華，也不必太認真，不過陳麗華背景神秘，確實顯示過一啲不尋常的影響力，不妨同大家分享一些資料。
陳麗華被形容為慈善家
《時代周刊》今年百大影響力人物當中，身家據稱有55億元人民幣的陳麗華被形容為慈善家。今次為該刊撰文介紹陳麗華的，係香港影星成龍（我哋估計係成龍口述搵記者代筆），佢話陳麗華發揮的影響力，在於為人慷慨、親和，又平易近人，成立紫檀博物館，對宏揚中國傳統藝術文物紫檀貢獻巨大，亦對教育有重大貢獻，幫助其他人實現夢想云云。
成龍對陳麗華的讚美，《華盛頓郵報》美籍華裔記者潘公凱（PhilipPan）應該另有睇法。潘公凱2008年出版的得獎書籍《OutofMao'sShadow》，發現中國官方傳媒對佢生平講啲唔講啲之餘，美化咗唔少。
起名店拆胡同 爆維權戰
陳麗華經常被歌頌成保護中國傳統藝術文物。但2005年，陳麗華的私人公司富華集團，喺北京發展名店林立的金寶街項目，遷拆大量老胡同，當中有不少是民國名人故居，引發胡同維權。潘公凱喺書中講到，香港傳媒最初都有跟進事件，不過陳麗華人脈廣泛，施展影響力，不單內地報章受壓，香港幾份主要報紙都未能全力跟進報道。當時有份幫陳麗華游說傳媒高層的，有說包括咗影星成龍。
潘公凱披露，有中文報章相關報道出街之後，駐北京記者喺餐廳見到陳麗華的律師、清拆公司代表、官員等，「邀請」佢見陳麗華，記者當場拒絕，但清拆公司代表要求抽起文章，否則用「其他方法」處理。潘公凱指出，為安全計，記者暫時調離當地。
陳麗華80年代移居港
官方傳媒包括新華社等，將陳麗華描繪成憑雙手在80年代搜羅紫檀、做家具生意打拼出來的實業家，之後投資房地產致富。潘公凱訪問曾經喺陳麗華身邊的人物，得知她發迹的其他細節。
傳靠出口清明古董致富
潘公凱指，陳麗華得到北京共產黨員鄰居之助，80年代移居香港。陳麗華透過關係，接觸到一家文革時充公大量古董傢俬的工廠。工廠前員工話，陳麗華低價購入清明古董傢俬，再出口到香港，利潤豐厚。中國甚麼古董可以出口，受到法例限制，但陳麗華仍然能順利做成買賣。後來潘公凱親口問及陳麗華此事時，潘公凱形容陳麗華的答案含糊其辭，後來索性話「我也有我的經濟秘密」。
賺咗第一桶金後，陳麗華喺80年代尾將下一個目標定喺北京，發展地產項目，但她不是發展住宅商廈，而係搞可以連繫政商名人的私人會所，個會所就係在中國政商界聲名震耳的長安俱樂部。
建長安俱樂部 影響力大
長安俱樂部位於北京市東長安街十號，對正北京飯店，位處京城中心，接近各政府部門。據熟識北京政情人士講，出入長安俱樂部的全部係高官巨賈，會員包括國企老總、民企老闆同埋香港大孖沙。陳麗華亦因為長安俱樂部，有機會接觸北京權力核心，關係網越爬越上。潘公凱喺書中講，陳麗華後來喺北京發展東城區項目，收樓遇到維權事件時，可以直接向李瑞環寫信陳情，信件經過賈慶林、王岐山等人，最後由北京副市長劉志華（後來因貪污案被捕）親自出面擺平，印證陳麗華的影響力。
陳麗華在香港十分低調，不過政府2009年的活化歷史建築計劃，由美國薩凡納藝術設計學院，奪得北九龍裁判法院的營運權，陳麗華亦有份做學校校董，當日喺宣佈結果的記者會上，仲同發展局局長林鄭傾偈、搭膊頭影相。《壹週刊》當年都有報道，陳麗華為宣傳薩凡納，親身上陣做說客，陳麗華早已代表學校頒名譽表演藝術教授畀成龍，又請成龍拍宣傳短片，反映兩人幾咁友好。
潘公凱喺書中指出，崛起中的商人階層，本應對中國民主化起關鍵作用，但陳麗華這類商人的想法，有異於外界，原因係憑藉與權力的關係上位，佢哋最想維持現狀，對推動民主化毫無興趣。時代百人榜中，香港人代表只有陳麗華一人，或者顯示喺香港，邊種人先有影響力。