自內地公佈第一季經濟增長遜於市場預期後，港股便一直維持強勢，上周即使數次因外圍回調而低開，但都能拗腰上番去，原因好簡單，投資者見內地經濟增長減速比預期快，便憧憬中央放水空間比之前大。筆者其實唔多認同放水空間大了，因為總理溫家寶都話增長目標係7.5%，現時8.1%實際上唔失禮，當然，各種微調及減存款準備金率今年預期會繼續做，只係唔好一廂情願上大人會因為GDP數據，而忽然加大放水力量或者提高密度，尤其在通脹情況仍頗為反覆時。
大市上到21000點這個整數關口，開始有點阻力，正如先前所言，港股仍處於上落市中，現時在中間位做好水位略嫌不多，如已有一定貨底的實毋須心急加碼，如果睇淡，現水平又似乎唔夠高，而且以近日港股偏強的表現，貿然沽空隨時可以挾死，短線而言，如無特別心水，一動不如一靜。而組合方面，亦會繼續按兵不動。
本周開始，中資股開始進入公佈季績高峯期，當中包括幾間重磅金融股，大家大可利用市靜之時做定功課，從各企業的成績單中，窺探內地經濟及企業經營情況，對往後部署應有相當得着。
張士佳
寶來證券（香港）資產管理部董事
本欄逢周一、三、五刊出