不少新一代父母都被標籤為怪獸家長，有線主播區永權（Albert）兩年抱兩，亦一直希望自己唔好加入怪獸行列。Albert雖然鍾情雙座跑車，但為了兩子，亦開始考慮買七人車，訪問中更大嘆囝囝已被縱慣唔肯坐BBCarSeat，見他對仔仔百般遷就陰聲細語，相信他已忘卻跑車輕狂之味，慢慢走上怪獸之路。
記者：許維雅
攝影：譚盈傑
場地提供：海港城
靈活大尾廂 方便多仔公
找Albert做七人車試車訪問，他毫不介意帶埋太太Clara及囝囝Aidan一齊出來拍攝，欣然接受由區公子變做區爸爸的身份，諗住新鮮熱辣到港的混能七人車豐田PriusV最適合呢位新任多仔公。「我的確有諗過買七人車，但可能等兩個仔大多少少先，最慘係家大仔一坐CarSeat就扭計，所以七人車暫時未用得着。家比較迫切嘅，係尾廂夠唔夠大，一個學行、一個要抱，每次出街真係勁多嘢攞！」毋須經常用到七座位，摺合第三排座椅後帶來200公升的儲物空間，而第二排座椅亦有不同程度的摺叠組合，除方便上落，完全摺合後更可為整個車尾帶來1,731公升儲物量，PriusV似乎幾貼合Albert所需。加上他第一眼望見PriusV長闊高達4,615×1,775×1,600mm的頭尖尾圓流線身形，亦大讚它動感有型，唔似其他笨笨七人車。流線車身還有減低風阻的用途，風阻系數低至0.28Cd有助降油耗，貫徹環保宗旨。此外，特大雙天幕頂亦以環保行先，採用比普通玻璃輕40%的特別素材，有效隔熱及備有接近100%防UV功能，車主鎖車時，天幕頂太陽擋更會自動關閉，避免大熱天時曬㷫車廂，日本設計師果然特別細心。
新電池保養七年增信心
揸了十幾年車，家揸緊AudiA4，Albert愛揸車但自言未算狂熱份子，「以前鍾意性能強嘅跑車，一上高速開個Sport模式飆幾下，超爽！家有小朋友，都即刻換番部房車揸，第時換車都首要考慮安全同穩定性。」講到穩定性，全新PriusV加入車身起伏控制功能，系統會因應路面凹凸情況來調節電動馬達的扭力，從而提升軚感及抓地力以增穩定及舒適性，加上ABS、TRC及VSC等電子控制系統，正以為各方面都令Albert好滿意之際，怎知原來他對混能車認識不深，配備1.8公升Hybrid油電混合動力引擎的PriusV，搭載更輕巧細小的新鋰離子電池，不只為車廂騰出更多空間，亦帶來更寧靜環保的表現，見代理為新電池提供七年原廠保養，就知廠方幾有信心。邀請Albert試車，他着車時驚叫：「着咗嗱？」令他驚訝的還有23.2km/L的油耗，每公里只需約$0.75，「咁勁？係咪真㗎？」深明環保車是大勢所趨，但他說：「有揸混能車嘅朋友話唔係幾夠力呀！成日要開住Power模式。」再問暫時有哪款車好想換？「哈哈，其實我想換番兩座跑車。」唉，骨子裏依然留戀又型又辣跑車的Albert，為囝囝放棄所愛，實在難為了爸爸。
豐田PriusVSuperLuxury
引擎：1,798cc直四VVT-i配同步電動馬達
馬力：99ps/5,200rpm（油電混合動力總輸出136ps）
扭力：142Nm/4,000rpm
傳動：電子控制無段變速
售價：$369,400（已扣除環保稅）
查詢：23054555（皇冠車行）
