「性癲佬」教人45度角與異性溝通，掂唔掂股榮唔知，但如果應用喺股市，應該無往而不利，亦稱得上炒股致勝法。先講解點解要揀45度角股，然後俾幾個「股辦」你睇。
股份升升跌跌，持續一段時間後，必定會出現走勢形態。沿45度角向上的股票，走勢最穩，坊間稱之為「樓梯股」。
一級一級向上爬升，悶得嚟夠安全夠踏實，可以細水長流。偶而摔倒無傷大雅，企穩後重新出發，再上一層樓。
夠索有概念 時刻有驚喜
當然，45度角股要睇一段時間先能作準，正如男女交往初期，蜜月期間大家循規蹈矩不逾越，當以為是正人君子或窈窕淑女之時，醜態陋習真面目可能不經意流露出來，抽水事少，停牌事大。這個時候45度角股應該呈下跌方向走，如果仲賴死唔走分手止蝕，隨時一鋪清袋。
45度角靚股要有三個條件，最重要當然係夠索有概念，兼且要有主場位置。講得白些就是恃靚行凶，遊戲一開始已經不公平，佢主場話晒事佔盡上風，你唯有乖乖聽話，逼住自己用佢嘅產品或服務，如果唔係，就索性唔用講BYEBYE。
第二係要令人覺得你仲有驚喜及神秘感，戀愛最美好就是曖昧的時候。同樣道理，炒股最爽的日字就是憧憬的時候，倘若連最後一層面紗都被掀起，底牌被揭開，恍如落妝後真面目示人，估值反璞歸真，唔跌都難。
第三是觀音兵夠多，股壇觀音兵泛指基金、財演以及分析員。靚股平時對記者密密實實，但對住財演或分析員，通常會露多少少益街坊，講解多些業務發展及新構想。對住基金唔會大蝕底，不會大折讓配售。
今年有兩隻45度角筍股，一隻叫騰訊（700），另一隻叫蘋果，美國上市嗰間。騰訊今年初由160蚊起步，升到上周高見240元，升幅足足50%。蘋果仲癲，由400美元最多升到接近650美元。
騰訊走勢佳 蘋果宜觀望
兩隻股越高竇越多人追，前者喺中國主場玩晒，後者你我身邊都有人用其產品。兩者都有大批觀音兵追捧，目標價越吹越勁，基金驚輸死持不放要焗搶。
形態上，QQ還可以保持45度角向上走勢，不過蘋果就似乎走樣。是否黔驢技窮，不妨睇埋facebook上市後，以及iPhone5今年推出有冇料到先作結論。
股榮