後天雙眼失明的44歲莫儉榮（Kim）告訴記者一個小秘密，他說與兒子合謀，替患有嚴重弱視的妻子，一家三口在母親節當天參加點滴揹水行，「畀佢有個驚喜，度過一個不一樣嘅母親節，由囝囝做佢領跑員，拖住佢隻手一家人完成23公里路」。
在旁人眼中，Kim一生坎坷。他形容自己出身黃大仙貧民窟，4歲時右眼「好似突然熄燈黑晒」，左眼13歲那年視網膜脫落而全盲，「10幾歲乜都睇唔到好大挫折，一次跟前輩過馬路，行到路中聽到前呼後嘯的車聲，嚇得狂叫」。
衝線一刻 蛋糕贈愛妻
失明，變成絕望；黑暗中卻找到光明，「唔知點解突然開竅，諗到盲咗仲要加倍努力」，拚命讀書，升上聖保羅男校，預科畢業後任職盲人按摩院接待員，人工1,800元，後轉工至香港電訊任接線生。他說，一生人中最大好運，是28歲娶了太太，先後生了兩名孩子。那時一家收入約三萬元，但感到電訊業前景不明，31歲時毅然辭工入讀浸大修讀社工課程，「好感激太太支持，佢辭咗份工照顧兩個小朋友，靠積蓄過活」。
莫妻咬緊牙關三年照顧一家人，以圖書館為家的Kim終以一級榮譽畢業後，由任職社工，到去年創業開設盲人推拿按摩治療中心及創辦猛龍隊，「有今天，我好感激我太太，剛18歲嘅兒子都係咁諗，咪夾計喺母親節參加揹水行；囝囝仲話幫媽咪揹埋4.5公升水。我會喺過終點嗰陣，送太太一個母親節蛋糕，多謝天下間嘅母親」。
《蘋果》記者