新世界百貨（825）淨銀彈夠多，呢期個市陰晴唔定，新百貨防風力強，有得諗。新百貨上年底現金42.5億銀，得貸款10億銀，大嗱嗱揸住淨現金33億銀，加埋超級大孖沙彤叔系新世界（017）做大股東，穩陣到爆。又新百貨家陣揸主打業務地區祖國嘅經營樓面，超過1千萬平方呎，又涵蓋晒主要城市，喺12年半年度（12月底止），純利都keep住12%雙位數增長，到3億銀。莫忘記，喺呢個半年度之內，歐洲繼續唔掂檔，力加埋阿爺當時又未微調放水，新百貨張成績表有咁表現，已經唔錯。唔計特殊性因素，估新百貨12年度賺7億銀，實際增長翻近半番，預期PE12.7倍，博升三成到6.8元，預期PE都係16倍多少少，CHINAPLAY嚟講，唔係貴。
川河穩陣煲冷灶
川河（281）手頭現兜兜淨現金3.8億銀，又係另一隻現金牛，財政穩陣到痹，但冷股無人留意。又川河家陣揸住湯臣（258）過10%投資，後邊湯臣，手執多個靚仔項目，隨住阿爺控調逐步解封，湯臣另一輪發力，股價水張船高時，川河家底又肥仔。呢轉冷灶煲川河，博升20%到0.26元，未有耐上到NAV0.59元。
錢雋