達明一派前晚於紅館展開一連四場「兜兜轉轉演演唱唱會」，黃耀明戴上陽具裝飾帽子演出，他演繹新歌《It'smyparty》時，大會屏幕播出「黃耀明是同志？」句子，事後明哥表示自己是甚麼人，大家都知。
達明一派「兜兜轉轉演演唱唱會」前晚於紅館揭開序幕，到場支持的藝人包括葉德嫻、甘國亮、盧凱彤、梁詠琪、林夕、王菀之、俞琤和黃偉文等。甫開場，劉以達唱出《晚節不保》，接着二人獻唱《馬路天使》、《石頭記》和《今天應該很高興》等多首經典歌。
「我好多另一半」
黃耀明獻唱新歌《It'smyparty》時，大會屏幕播出「我們是同志」、「董建華不是同志？」、「梁振英是同志？」、「黃耀明是同志？」等字句。事後明哥接受訪問時，被問到「同志」的意思所指為何？他說：「入面乜都有。」問他「黃耀明是同志」會否擔心被對號入座，還是想釋放出來？他反問：「你覺得黃耀明是同志有問題咩？我釋放咗好耐㗎啦。我係乜嘢人大家都知，但係畫面上所指嘅人都唔認自己係同志，為咗你哋有嘢寫，我都唔認住啦，認係型，但係我唔講清楚，你覺得我唔型咩？」問他是否想給另一半名份？明哥說：「我好多另一半，阿達係我音樂上嘅另一半。」
前晚，明哥換上一套黑色西裝、戴上一頂有黑色假陽具裝飾的帽，演繹《忘記他是她》及《禁色》，現場播出長髮及短髮明哥擁吻的短片，對於戴上假陽具裝飾的帽子，明哥事後說：「呢啲好小兒科，呢個社會太多壓抑，呢啲唔係禁忌，可以談論。」
寸GaGa麻麻哋
劉以達全晚則大放笑彈，他說：「我哋個騷好抵睇，人哋幾千蚊一張飛都係麻麻哋，人哋啲『二出文』（equipment）先進啲，坐飛機嚟，我哋就坐直通車。」似暗寸即將來港開騷的LadyGaGa。
採訪：李珮洳
攝影：黃文偉
