多得我的補習老師，提醒了我原來這個世界很多問題都有標準答案，而有標準答案的世界裏，再多的問題也不怕，因為總會有答案，讓你把煩惱通通掃光。
這個星期補習老師替我解決了兩個問題，第1題是如何分辨蔬菜和生果，第2題是如何分辨細菌與病毒，原來前將之分在於種籽，後者之別在於size，做了幾十年人才明白這些咁基本的常識，我沒有自慚形穢，反而有點茅塞頓開，舒服晒。
補習老師是我的女兒，每次替她溫習時，表面是我教佢，其實是我把握機會重新學習一次（重新這個詞可能錯了，因為很多東西都沒有學過），然後在她提出古怪刁鑽的疑問時，就扮勁的去回覆一次，好好演繹一下聰明老竇的角色，不過隨着越來越多嘢唔識答之後，我決定唔做老竇，轉做同學一齊研究搵答案，轉換身份之後父女兩人都幾受落，而我亦索性向女兒預告，下年佢做老師我做學生，佢欣然答應，我呢，仲開心過佢，唔使扮勁囉！
出來社會浮沉以後，就要學習扮勁，起初是因為自信不足吧，你唔「chok」啲，人哋又點覺得你型呢，鬼知道原來自然才最有魅力呢？
然後工作的環境慢慢迫使你，或為誘使你扮勁，講波時代，唔講得振振有辭，有你講冇人講的話，又如何可以建立權威？撳錢日子，唔樣樣識通天曉又點會得到撳友喜愛呢？要有江湖地位，最好極速攞到一個尊貴外號，如達人、專家、導師等等，自然容易快人一步、理想達到。
可惜扮勁與堅勁是兩碼子的事，我知道我是水貨，因為這幾天當很多人都提出同一個問題時：「巴塞鬥皇馬點睇呀？」，我發現我唔識答，然後講得出口的，都是一個普通過唔普通的球迷會講的東西：「巴塞啦，主場吖嘛；巴塞啦，唔贏唔得呀；巴塞啦，好睇啲嘛；巴塞啦，有美斯呀……」咁，我講的都是衷心話，只不過實在呢也沒有甚麼深度，只是當我保持着這種fans的片面睇法和主觀激情時，人就有點輕鬆了，睇波時也更嘈喧巴閉，咁好feel，那還是不要扮勁吧了。
女兒已經多次表示要一齊睇深夜波，偶爾可以試一次吧，不過要與她約法三章，她不准做老師，大家都只可以是fans。而最好就是支持同一隊啦，相信一件靚靚波衫就可以收買成功。
文：keyman