有傳即將於10月結婚嘅霍啟剛同郭晶晶，唔知係咪好事近，兩位傳聞中嘅新人噚日好罕有咁雙雙出席「源BlancdeChine」喺中環文華東方酒店舉行嘅新店開幕酒會，同場仲有特首曾蔭權，同埋就快做老竇嘅劉德華，以及新婚嘅薛嘉麟同諸葛紫岐。
霍啟剛同郭晶晶心情大靚抵達會場，仲以情人姿態着晒情侶裝，霍啟剛着咗一套黑色中山裝，郭晶晶就以黑色旗袍相襯，兩人仲好大方企定定任記者拍照。
唔講婚事
霍家未來新抱郭晶晶含羞答答，大家梗係唔放過機會，問佢哋兩個係咪結婚？佢哋兩個都冇回答，霍啟剛仲耍記者話：「轉頭出嚟訪問。」霍啟剛好有紳士風度輕撫女友郭晶晶背脊入場，當然佢兩個就咁一去冇回頭啦！
噚晚嘅活動仲見到許鞍華，對於爾冬陞批評金像獎頒獎禮太感性，許鞍華雖然有份攞獎，但都好中肯咁話：「的確係有少少偏重咗港產片，畀多咗感情分，應該檢討。」不過佢都好讚成劉德華攞影帝。
