無綫劇集《盛世仁傑》噚日喺電視城搞咗個吐氣揚眉記者會，鄭則士（Kent）、陳錦鴻等演員都有出席。套劇做咗四年倉底貨，但係有一班好戲之人助陣，觀眾反應好好，呢個星期平均收視有32點（205萬人），最高收視有36點（231萬人）。
Kent哥話梗係開心，但都忍唔住要吐苦水：「我唔敢講係吐氣揚眉，但點解要沉寂多年，拍完套戲又點解會畀某監製拍一套女裝宮廷版？呢啲行為係咪屬於盜版？呢部劇拍完都未喺出面播，點解可以畀其他監製睇？今日諗番都覺得係唔應該發生嘅事，但好好彩畀我哋攞到呢個收視，真係好滿意。」
自我警惕
Kent哥仲話：「感謝所有戲中演員用心去做，先經得起時間考驗，更加警惕自己要努力做好本份。」問到會否同公司反映？佢話：「我諗唔需要我反映，過程做咗係有人知，如果唔去糾正都冇辦法。」
Kent哥始終唔講係邊個，但據聞佢指監製梅小青偷橋拍《宮心計》，陳錦鴻亦話：「如果我哋係好嘢，俾人吸收係好事。」力撐成套劇真金不怕洪爐火嘅曾勵珍話絕無此事，可能Kent哥聽錯訊息，會同佢解釋番。