大角嘴杉樹街的重建項目由業主主動提出，業主居住在日久失修的唐樓內當然盼盡快遷出。惟在地舖首次創業開串燒餐廳的租客馮先生卻大感無奈，他去年7月才斥資逾百萬元裝修，但不足一年卻面臨結業的命運，「要收番間舖對我打擊好大，我都好想繼續做落去，希望市建局可以幫吓我」。
從事機械行業的地舖業主黃先生指，現時各區租金昂貴，盼政府能賠償2,000萬元，「我睇過同區嘅舖都要成千萬入場費，我做呢行要要700、800呎先夠位，希望賠到畀我繼續做落去」。
望每呎賠償9000元
負責拉攏業主向市建局申請重建的梁先生，其單位約460呎，他指大部份業主都贊成重建，盼市建局提出的賠償金額能與馬頭圍道重建項目相若，「家啲樓價咁貴，希望每呎有9,000元先至買到樓」。
在杉樹街住了近50年的業主徐先生指單位漏水情況嚴重，廁所牆身及喉管都佈滿鏽迹，加上樓宇衞生環境惡劣，治安又差，「以前有吸毒者喺樓梯食白粉，附近又嘈，想快啲搬走。」重建樓宇內亦有幾間劏房，鄧先生現時以約1,300元租住一間百多呎劏房，他擔心重建後難以再找到租金便宜的地方居住。
《蘋果》記者