食字部：軟硬芒暈你

港人瘋愛芒果，記得早年有報道指全世界最靚的芒果，全是運送到本港。下午茶自助餐有芒果甜品任食開胃，同時有十多款精緻鹹點任擇更吸引。一邊吃着即製的米紙卷，加上一啖一口的芒果海鮮蛋批，軟的硬的，總之一於芒暈你。

記者：林佩婷
攝影：蔡家輝
Model：Cynthia

青芒煮醬汁唔易溶

■部份熱葷和甜品由師傅現場即製，保證新鮮。

近年港人愛下午茶，而餐廳都盡量以輕食或迷你版為主，等大家可以試多幾款。據餐廳總廚Kenneth所講，現時正是芒果的當造季節。「之前是士多啤梨當道，由現時至夏天，則是各類芒果的當造時節。這次我們選用香港人熟悉的菲律賓呂宋芒和泰國青芒，前者味道較甜而果肉偏腍，後者看似很酸，但其實也是味甜，果肉入口較實淨，猶如吃梨般香爽。」
自助餐約30款芒果鹹甜點，鹹吃就佔三分一，Kenneth為了讓大家吃到新鮮材料，在菜式上配合大眾化口味，故除了體積較細外，也選取大路菜式，不刻意追求創新。超迷你的焗芒果海鮮蛋批，用上魷魚和蝦肉混合蛋汁焗，吃時再加上芒果粒，海鮮鮮味和清甜果肉超級夾。愛香口必要試脆到入心的泰式糖醋芒果脆雲吞，配上兩種芒果混合而製的糖醋汁，入口脆卜卜，吃到不捨得停手。怕熱氣又可點現場即製的芒果大蝦米紙卷，清新蝦肉配上果肉，即時消除雲吞的熱氣感。

■（左）菲律賓呂宋芒和泰國青芒同在當造時候，前者甜而腍身，後者則較爽。

■泰式糖醋芒果脆雲吞，青芒和呂宋芒做成甜酸醬汁，一硬一腍增加口感。

■法式芒果香酥焗批，感覺有點似中式油炸鬼。

■芒果大蝦米紙卷，好Fresh。

迷你一口壽司糯米

站在甜品櫃，一片鮮黃色看得眼花撩亂。酒店餅房總廚GustiLanang全用上鮮甜的呂宋芒製作，設計了很多傳統的法式芒果甜品，如感覺超creamy的芒果奶油蛋白酥、芝味十足的鮮芒法式蛋白脆餅、外脆內濕的芒果忌廉奶油酥餅和鬆脆的法式芒果香酥焗批等。不過講到簡單而搶眼，就要數即製一口香芒糯米飯，雖然只是用黑白糯米加椰汁，但師傅就想到做成迷你壽司模樣，在上面放切薄的芒果片，部份再配合不同的醬汁如朱古力醬或椰汁等，令造型即時升呢外，還令香甜度倍增。

■一口香芒糯米飯，一啖一嚿，又不太甜。

■芒果忌廉奶油酥餅，非常軟滑。

■焗芒果海鮮蛋批，層次豐富。

■鮮芒果法式蛋白脆餅，好滑。

■芒果千層酥，酥皮脆身，配上酸甜度十足的芒果，很鬆化。

芒果魔幻狂熱下午茶自助餐

日期：即日至5月31日3pm-530pm
地點：尖沙嘴彌敦道20號喜來登酒店2樓TheCafe
價錢：成人$198起、小童$128
查詢：23691111