喜歡周遊列國，玩到邊食到邊，大前提下當然係DC不離身！但同時兼備上山下海、防撞防塵等勁Tough功能，試問又有幾多款？Panasonic趁初夏來臨，率先推出四防相機TS4，挾鐵甲機殼加埋防水設計，再內置203個國家定位資料，玩到「山旮旯」一樣定到位，唔怕Miss重要一刻！
記者：陳國輝
攝影：劉永發
Model：Kiko@Zmodel
雙重防水保險
叫你買番個獨立潛水Case，唔係嫌貴，就嫌大件唔靚仔！初見TS4外觀，最令我想起即將上畫嘅《復仇者聯盟》中，穿上厚重鐵甲嘅IronMan，事關TS4用咗特別物料以加強防撞性。據官方講，兩米以下跌撞，仍可維持正常操作；更Tough係，鏡頭採用潛望式設計，既提供強達4.6倍光學變焦，亦唔怕因跌撞而整爆鏡頭內嘅精密鏡片，但係，官方無講過可防花及防撞凹，所以攀山涉水都係錫住部機好啲！
所謂落水能游，TS4也支援IPX8國際防水標準，亦即係可在12米水深及-10℃環境，進行正常拍攝活動，只怕你潛唔到咁深啫！就算機身最牙煙嘅電池位同卡槽，都提供防水膠邊及保險掣，雙重保護；手握位也特別採用防跣設計，唔怕部機落水後滑走！
配置GPS指南針
淨係玩水？叫得做四防，梗係唔夠喉啦！除咗外加防撞、防塵同防低溫外，仲為鍾意四圍探險及周遊列國嘅發燒友，特別炮製咗結合地圖資訊嘅GPS功能，只要開啟全球定位系統，佢即可於2.7吋屏幕上顯示你身處嘅位置。現時提供嘅國家及地區資訊已多達203個，而拍攝好嘅照片或影片，TS4會自動將地區、景點資訊儲存到DC，配合附送圖像軟件，更可於瀏覽相片同時，獲得拍攝地點資訊，十足好似自製旅遊書咁過癮！
而特別喜歡冒險嘅旅行家，此機還提供指南針、高度計同埋氣壓計等即時資料，成副專業儀器咁，但注意長開好食電㗎！
逆光偏灰
逆光下，由於TS4不設HDR，而最大光圈值也只有F3.3-5.9，喺陽光不足下拍攝，難免色水又灰又暗。
膚色有層次
正光拍攝下感覺靚晒！皮膚顏色層次感強，而且凹凸不平嘅石邊質感亦相當豐富，只恨當日無藍天白雲。
PROFILE：
感光元件：1,250萬像素CCD
鏡頭：LEICADC
VARIO-ELMAR
變焦：4.6倍光學/9.3倍數碼
查詢：信興（28330955）
