櫻花之美，齋睇相已經可以感受得到，親身睇相信絕對更加動人。但賞櫻講求天時地利，攝影玩家Chris在出發前才等到Dream機富士X-Pro1到手，殊不知頭兩天竟不見櫻花芳蹤，以為敗興而回，卻在往後幾天守得雲開，拍下一張張傑作。「其實啱Feel嘅相機同靚景一樣，總是可遇不可求的。」
記者：韓繼聰
攝影：Chris、林栢鈞
淡紅櫻花 別具韻味
富士X系列，未出已造成話題，到月前推出，更出現缺貨現象，個個大讚佢賣相一流、相片有菲林味。而從事設計嘅Chris玩相機近十年，Pro就唔稱得上，但絕對係發燒友一名。用過唔少數碼相機嘅佢，對X-Pro1可謂一見鍾情：「我好愛復古風，見X-Pro1無論外形同操作手感都極有舊相機風格，唔使諗，即買！」
講番今次櫻花之旅，都有啲出師不利，頭幾日京都太凍兼天氣差，完全無花睇，到大阪時，X-Pro1先叫正式出鞘。「用X-Pro1影花影景真係一流，顏色準確之餘，亦夠鮮艷奪目，淡紅櫻花在鏡頭下真係靚到不得了！」除咗色彩表現，Chris更愛佢成像質素，配合FUJINONXF35mmF1.4R鏡頭，可見相片質素極高，無論花、景、人都非常細緻銳利，Details位亦比一般數碼相機豐富。
相質毋庸置疑，但對焦慢卻是其他用家最大不滿，Chris對此不以為然。「愛X-Pro1都係愛佢嘅古典美，每張相都經自己慢慢思考、調校，加上今次多影靜態的櫻花同風景，所以完全唔覺有咩問題。」其實Chris都有玩古董菲林相機，手動對焦鴐輕就熟，對焦慢一點點又有乜所謂？反而與被攝者有多點時間溝通，拍出來的也有多一點感情。「其實今次賞櫻有點弔詭，景點無花，反而路經一些小公園就花開處處，滿有驚喜，影出嚟一樣有Feel。」
富士機王靚相四招
醒你三點小貼士
同X-Pro1形影不離八日，由初相識變成知己，Chris就有用機小貼士同大家分享。第一點需注意係電池，唔試過都唔知，原來X-Pro1都幾大食，Chris試過一個上午約二百多張相便K.O.一粒電，要急忙到處搵後備電，狼狽之餘還錯過了其中一個景點嘅拍攝。
第二就係要多留意曝光補償轉盤，「我發現部機從袋中攞出攞入時，好易無意中轉動了曝光補償轉盤，每每都係影完一張先發現。」需知攝影好多時都是一剎那的事，因為咁而浪費一個美好Moment就唔抵喇。
最後就係要善用「Q」按鍵及膠片模式，「Q」按鍵可儲存七個自己設定的拍攝模式，能好好活用的話，可以非常方便拍攝不同感覺的相片。而膠片模式則是富士相機其中一個撒手鐧，可能生產開菲林，膠片模式模擬出來的色彩特別像真兼有Feel。「我最愛色彩較濃艷嘅膠片模式，影櫻花啲色會特別出，而且有種濃厚菲林味嘅懷舊感覺！」
公公婆婆拍櫻花 腳架高過人
日本的公公婆婆影相超Pro，比起香港龍友有過之而無不及。「見班老友記Set晒腳架，攞住一支支大炮，對住櫻花悠然自得慢慢影，有啲腳架仲高過啲婆婆，感覺真係好有趣，更佩服佢哋有如此魄力同熱誠。
大師級示範
東京出世嘅m.s.park，現為日本潮流雜誌《流行通訊》攝影師之一，人生目標係提升攝影文化，以及做個100歲仍繼續影相嘅攝影師。早排喺新機推出時，佢就搞咗個X-Pro1攝影展，展出走訪南美、為新機拍試機相嘅作品。雖然攝影展剛完結，不過日本富士網站上載咗m.s.park部份作品，每張相有晒評語同感想，邊睇邊估日文，都感受到佢對攝影嘅熱愛。
網站： http://fujifilm-x.com/x-pro1/ja/reviews/photographers/mspark/
傳聞九月出M環
好多專業拍友，最希望富士快快手出齊G同M接環，讓一堆Leica、Contax鏡有用武之地。雖然傳聞廠商到九月先推出，但坊間已陸續出現幾款代用品，叫價近八百蚊，不過X-Pro1配上Leica鏡，又確係靚仔得有點過份。
PROFILE
感光元件：1,630萬像素APS-CX-TransCMOS
感光度：ISO200-6400（標準）
屏幕：3吋
記憶卡：SD
查詢：富士攝影（24063225）
