「開始時都有贏，之後就場場輸，搞到欠落周身債！」住在逸東一邨的家庭主婦黃太（圖），兩年前開始流連邨內的麻雀檔，因輸多贏少，經常連家用也輸清，惟有向檔頭借錢翻本，但手風欠順，因而欠下約6萬元賭債，「最後老公問親友借錢至還清啲債，之後唔敢再打啦」。
有個案離婚收場
黃太又說，邨內不少師奶也因為沉迷賭博而欠債纍纍，有些甚至搞到婚變，「呢啲檔口一日存在，邨內嘅賭風都唔可以解決」。民主黨社區主任郭平十分關注逸東邨麻雀檔引發的家庭問題，他說，有師奶因日夜流連賭枱弄致家變，離婚收場，「其實呢種麻雀檔五、六年前開始有，可能東涌少娛樂，加上少社區設施，令唔少家庭主婦沉迷打牌」。
郭平又說，曾有男住戶因妻子終日只顧到麻雀檔打牌，以致家不成家，向郭平訴苦時激動得流下男兒淚。郭平介入調停，多次規勸該爛賭婦人，可是這對夫婦終因感情破裂，離婚收場。他曾接觸邨內幾個家庭，都因妻子沉迷在麻雀檔打牌，令夫婦關係危危乎，他希望警方及房署盡快採取聯合行動，避免更多家庭支離破碎。《蘋果》記者