陳慧琳（Kelly）的神秘二公子劉琛（小龍包）樣貌終於曝光！昨日是小龍包農曆彌月之喜，Kelly趁機公開兒子的可愛面貌，小龍包集父母及哥哥蝦餃仔的大成，下巴似哥哥，嘴仔似Kelly，樣貌似爸爸。自Kelly誕下細仔後，Kelly家中的「一盅兩件」馬上成為廣告商的囊中「點心」，並以八位數字力邀Kelly三母子拍點心廣告。
陳慧琳上月21日誕下幼子小龍包，但一直沒有公開小龍包的廬山真面目，Kelly趁昨日小龍包農曆滿月，發放了多張小龍包的可愛滿月照，同時四出大派千籠「小龍包」甜品慶祝，以蒸籠放了四個以蛋白製成的小籠包形狀甜品，並掛上心意卡寫着「我已經一個月大！我叫RileyLau，想請大家飲啖茶食個包！」幸福Kelly昨日開心笑說：「家有蝦餃仔，又有小龍包，一盅兩件。」
蝦餃仔雀躍睇冲凉
小龍包是父母與哥哥的混合體，貌似爸爸劉建浩、下巴似大佬劉昇蝦餃仔，嘴仔就似媽咪，Kelly表示由於每天要餵人奶，親自幫小龍包冲凉，同時又要講故事給蝦餃聽，十分忙碌，她說：「哥哥無時無刻都要聽故事，有時餵緊細佬飲奶，佢揸住本故事書行埋嚟，話：『媽咪講。』我咪一路餵奶一路講故事，細佬都聽到眼眨眨。」
哥哥有沒有幫手換尿片？Kelly哈哈笑說：「哥哥得兩歲幾咋，仲未識湊細佬，不過佢已知做咗大佬，每晚瞓覺前都會拖住我一齊入BB房goodnightkiss細佬至肯去瞓，每日放學就會搵細佬sayhello，我問佢睇唔睇細佬冲凉，佢就會衝入嚟睇。」
昨日Kelly接受商台訪問，表示暫未知兩兄弟性格有何不同，但肯定兩個仔都一樣大食，問到小龍包是否好湊？她說：「OK喎，都幾合作，一個月咋嘛，我諗之後辛苦啲。」她又表示Riley收到很多禮物，多數是衫和鞋仔。
Kelly下月全面復工，但因為仍要餵人奶，暫不急於收身，她說：「餵人奶日日要又魚又肉又雞又茶又湯，餵人奶唔算辛苦，但有時等佢食，都會等到腰骨痛，應該會餵兩個月左右，上次哥哥都係兩個月。」現在的體重離她平日的狀態尚肥5磅，如果距離做演唱會的狀態，就仍差10磅。
Kelly已有四年沒推出廣東碟，最近她翻唱了張國榮的歌曲《春夏秋冬》，坐完月便會開工錄新碟，希望今年可推出。早前Kelly未坐完月已帶蝦餃仔外出，她強調當日是大仔第一次看演唱會，她不想錯過其第一次。有否打算再追女？她說：「暫時我同老公都唔想，唔好搞咁多嘢啦，啱啱至生完。」
千萬誘拍點心廣告
Kelly的「一盅兩件」大受歡迎，兩年多前蝦餃仔出世已成為廣告商獵物，小龍包面世後，更令廣告商流口水，據知最近有廣告商以八位數字力斟Kelly的「一盅兩件」拍點心廣告，不過Kelly的經理人公司發言人說：「Kelly推咗喇，兩個小朋友仲咁細，唔想佢哋咁辛苦，暫時佢未有打算一家三口拍廣告，一家四口更加唔會拍。」
採訪：山葵、李珮洳
