新特首梁先生未上任先發威，公開宣佈2013年嘅內地雙非產婦來港生子嘅配額係零，冇得傾。此言一出，當堂令私家醫院硬晒軚，明年嘅一大筆生意冇咗，點算，特別係一間深水埗寶血醫院，近兩年轉型成為內地產婦醫院，明年大概可以再轉型為街坊醫院。
新特首有此命令，未退任特首及現屆政府不知如何是好，連隻腳都跛埋。梁生號稱「三低特首」，為咗提升民望，不惜向民粹叩頭，無視終審法院莊豐源案之判決，又不提人大釋法或修改基本法，究竟憑乜嘢法例理據而大聲宣稱「不保證雙非孕婦之子女可以取得香港身份證」？果真是強人特首！
內地孕婦來港產子固然對香港產生醫療壓力，王道解決方法係建設更多公立、私立醫院，開放海外醫生護士來港，乘機壯大本港醫療產業，成為中國最大醫療城市，次佳方法係以法理修訂（例如釋法）來限制雙非產婦來港，下策就係單方面以行政命令方式禁制雙非孕婦來港，此例一開，私家醫院之營運自由大受影響，其他市場自由亦無保證。梁先生干預市場運作，選擇以「雙非孕婦」為第一炮，以後可能以推翻地鐵加價嘅「可加可減」機制為第二炮，推出「港人港地」，限制內地人來港買樓會唔會係第三炮？可以預料得到，七月一號之後，梁先生會打造一個「有為政府」，不時會以「市場失敗」為藉口，干預任何市場。
呢日到會所食飯，碰到一位環保工程人士，與佢講起雙非孕婦，佢話隔行如隔山，就是不懂，但對於梁先生未上任，就令到立法會議員拒絕撥款興建焚化爐感到好失望，直情話梁生與議員合力打殘現屆政府，唔知對香港有乜好處，他日梁生上台必須面對垃圾處理問題，再過幾年，梁特首政府必然要再考慮興建焚化爐，立此存照咁話。不過，到時成本會更高！唔，環保係政治問題，不是環境問題，呢位環保工程專家大概只關心科技，不知道你唔理政治，政治會找到你頭上呀！