《我得寵》模何佩瑜（Jeana）認同「家有一犬，如有一寶」，她現在飼養了兩頭芝娃娃芝芝和豆豆。Jeana最錫三歲的芝芝，每當愛情遇到挫折，她一定回家抱着芝芝傾訴。擁有一雙阿凡達巨耳的芝芝接收了主人的怨氣後，再來個熱情親嘴，馬上令Jeana重獲正能量。
沒有愛情的日子，模何佩瑜全靠愛犬芝芝來治情傷，雖然芝娃娃的身形僅比手掌大丁點，不能像猛男般給Jeana送上寬闊膊頭，但牠勝在有一對阿凡達長耳朵，細聽主人心曲。Jeana日前說：「喺狗嘅世界，佢哋只係對主人最忠心，我覺得養寵物就要負責任，要成世用心照顧佢哋，當佢哋好似家人同朋友一樣。」
累愛犬斷腳歉疚
Jeana於三年前買了芝芝回家後，便視牠如掌上明珠，後來怕牠悶，故數月前再買另一頭芝娃娃幼犬豆豆相陪，誰知芝芝卻呷醋，「兩姊妹」弄得家嘈屋閉。Jeana擔心豆豆太細被欺負，一度把牠送到母親家寄養，讓姊妹分隔減少摩擦，偶爾才接豆豆回家團聚，Jeana日前趁陽光普照，湊住兩個寶貝女行公園，芝芝甫見豆豆便爭寵發脾氣，氣得媽咪Jeana大聲喝止。
Jeana直認偏愛芝芝，事緣年半前一次意外，芝芝的右後腿變殘障，Jeana心痛憶述：「嗰次我帶芝芝遊車河，佢坐喺我大髀，我開咗少少窗，芝芝好奇，突然跳咗出去，架車一路開行緊，嗰刻嚇死我，立即停車，好彩冇轆到佢，但佢就痛到係咁震同呻吟，我馬上同佢睇獸醫，原來後腳斷咗要做手術駁鐵片，我真係好驚佢捱唔到呢關，結果佢康服咗。芝芝係行得，但忌用受傷嘅腳，變咗三腳狗。」這次不愉快經歷，令Jeana對芝芝充滿歉疚，對牠更憐愛，Jeana說：「我好怪自己點解當時冇抱實芝芝，令佢發生呢次意外，所以我特別縱佢。」
當然芝芝都好抵錫，遇上Jeana不開心，懂性的牠會識呵主人，Jeana說：「芝芝好似feel到我心情，我心情好，佢會過嚟勁嗲我，相反嘅時候，芝芝只會過嚟舔吓我就行開，好想畀我靜吓，佢好有靈性，有時同佢咀吓都好心情。」
物色靚狗仔配種
三歲的芝芝精靈可愛，Jeana打算為牠徵婚配種，她說：「對象必須經我嚴選，因為我好知佢擇偶要求，佢鍾意靚仔，四肢粗壯，嘴扁扁，咁樣好咀好多，最好黑白色，佢哋生出嚟嘅BB會靚啲，邊個有靚狗即管將相傳嚟我微博過目。」
採訪：比華利 攝影：黃偉雄
亂餵險害命
Jeana視一對芝娃娃愛犬如囡囡般寵愛，為食的她甚至把這壞習慣傳到小狗身上，芝芝每次見到「媽咪」嘴郁郁，牠都饞嘴撲過去搶吃，Jeana以前必心軟與芝芝分甘同味。
斑點異常
Jeana說：「我嗰時只養芝芝一隻狗，錫到佢燶，人一世，狗一世，我有好嘢食都想畀佢試吓，於是我食乜咪分少少畀佢試吓。」
芝芝曾因雜食致毛色出現異常斑點，Jeana與愛犬朋友交流心得後，方知自己亂給芝芝餵食狗糧以外食物，愛牠變害牠，間接會縮短芝芝壽命，經過這個教訓，Jeana再不敢胡亂餵芝芝吃東西，她緊張地說：「我想芝芝長命啲，陪我耐啲。」
亂餵險害命
Jeana視一對芝娃娃愛犬如囡囡般寵愛，為食的她甚至把這壞習慣傳到小狗身上，芝芝每次見到「媽咪」嘴郁郁，牠都饞嘴撲過去搶吃，Jeana以前必心軟與芝芝分甘同味。
斑點異常
Jeana說：「我嗰時只養芝芝一隻狗，錫到佢燶，人一世，狗一世，我有好嘢食都想畀佢試吓，於是我食乜咪分少少畀佢試吓。」
芝芝曾因雜食致毛色出現異常斑點，Jeana與愛犬朋友交流心得後，方知自己亂給芝芝餵食狗糧以外食物，愛牠變害牠，間接會縮短芝芝壽命，經過這個教訓，Jeana再不敢胡亂餵芝芝吃東西，她緊張地說：「我想芝芝長命啲，陪我耐啲。」