郭富城一向喜歡馬，間中亦有賭馬怡情，早前更榮升馬主，買了一隻馬改名為「愛的呼喚」。前晚城城到跑馬地馬場出席活動，他叮囑馬迷只宜小賭，並自爆曾下注數十元買3T，結果一擊即中贏了過百萬彩金，他又說日後若有機會拉頭馬，會預埋女友熊黛林（Lynn）。
向來喜歡馬的郭富城，前晚到跑馬地馬場出席新開設觀賽區的開幕禮，同場還有何傲兒、胡琳、AnaR.、LisaS.和Jocelyn及老公Anthony等，相當熱鬧。城城即場下注20元買馬，不過輸了。榮升馬主的城城說自己喜歡睇賽馬，反而並非很愛賭馬，賭馬亦只是考驗自己眼光。
叮囑馬迷小注
至於城城的愛駒「愛的呼喚」何時可以落場比賽？他表示：「未有咁快，佢嚟咗香港之後一直住喺沙田馬房，不過下個月會搬嚟跑馬地住吓，會試吓畀佢晨操同試閘，如果我有時間我都想嚟睇吓。」
問城城平時賭馬贏多還是輸多？城城只說：「有時我嚟馬會都見到好多年長嘅馬迷，佢哋成日同我哋講唔好孤注一擲，刀仔鋸大樹都得。我就試過買幾十蚊嘅3T，結果贏咗七位數字，所以我都認為唔需要買咁大，當係同朋友聚吓，感受一下熱鬧氣氛都好開心。」
愛駒要操兩年
馬會開設新觀賽區，問城城會否帶女友熊黛林到此地方看賽馬？城城說：「總之帶所有男、女朋友嚟，如果佢（指Lynn）得閒都可以嚟。」再問城城的愛駒何時可出賽？城城表示最快要一至兩年才可以，問他若愛駒贏出，拉頭馬時會否預Lynn一份？城城笑言：「同我嚟嘅都可以，你哋（指記者）都可以㗎。」
採訪：胡比攝影：黃文偉