香港電影金像獎頒獎禮今年賽果有好大爭議，劉德華憑《桃姐》膺影帝，好多人覺得劉青雲贏先合理、《桃姐》攞晒最佳電影同導演獎，唔少人戥姜文嘅《讓子彈飛》唔抵！爾冬陞（小寶）前日喺微博話：「如果這獎只有感性，但失去了專業，會變成怎樣……董事局成員必需深思！」
下月開檢討會
小寶之後接受訪問話唔係對許鞍華有意見，純粹針對賽果，佢認為唔應該因港片弱勢就投畀港片，應該一視同仁，同時又讚《讓》片整體好出色。
吳鎮宇前日出席活動已經話青雲輸因為唔夠某某某朋友多。香港電影導演會永遠榮譽會長吳思遠接受內地傳媒訪問時話：「金像獎的評選有嚴格評獎細則，但獎項的產生是多種因素的相加，比如劉德華拿影帝，就不排除人緣好因素。」
金像獎董事局董事莊澄噚日就同馮仁昭講，下個月金像獎會有檢討大會：「下次開會睇吓可唔可以再完善評分制度，好難做到絕對公平。」
另外，喺《桃姐》中演蔡姑娘嘅秦海璐，未能奪得最佳女配角，佢喺微博度話：「此次與最佳女配擦肩並不遺憾，最佳女配我是早晚都要收的，這是我的決心也是我的目標。」獲唔少網民讚好。