堂堂港交所（388）主席夏佳理竟然畀恒隆地產（101）超過三成股東反對佢連任做董事（獨立非執董）!雖然依然成功連任，但係都有啲肉酸囉。
最終成功連任
恒隆地產噚日舉行股東會，老闆陳啟宗同夏佳理等四人尋求連任董事，做得藍籌股非執董或獨立非執董都有頭有面，通常以大比數通過。恒隆竟然有31.4%股東反對夏佳理連任，認真奇怪。
有人即刻猜測呢個結果係咪同夏佳理未必同下屆政府、候任特首梁振英關係良好有關，但好事之徒認為可能性不大，估計應該係基金股東嘅理性選擇。
華華翻查恒隆2011年年報，恒隆舉行五次董事會，夏佳理只出席兩次，一次提名及薪酬委員會會議無出席，股東會亦唔見人。其實咁都唔怪得夏佳理，除咗恒隆，佢仲身兼七間上市公司嘅非執董，近年又要為港交所招攬海外企業來港上市而周圍飛，難免分身不暇。
夏佳理自80年開始做恒隆獨立非執董，至今做左32年，唔好話公司，你同個朋友識左三十幾年，唔熟都變老友啦。港交所舊年都諮詢市場希望加強獨立非執董嘅獨立性云云。夏佳理又成73歲，年資同年紀都有番咁上下，有股東反對佢連任，要求換入新血都無可厚非嘅。