思捷（330）宣佈請了個CFO，佢就係一個月前先劈炮唔撈信置（083）嘅鄧永鏞（Thomas）。睇番思捷公告及信置年報，都只係形容Thomas加入信置前，係「一間香港上市公司」的執董，好神秘。海迪翻查陳年年報，發現Thomas於91至96年做過嘅上市公司，原來係擁有「魔鬼編號」666嘅新工投資（以前叫禹銘）。
相信大家對呢間公司唔陌生，佢以前係由馮景禧之子馮永祥兼「股壇壞孩子」馮耀輝打骰，「雙馮」以華麗財技聞名於天下，曾經發動「1仙收購」中巴（026），早排馮耀輝仲復出幫李寧搞咗隻殼非凡中國（8032）添！估唔到Thomas曾經跟「雙馮」搵食，唔知有無學番一招半式？
有接近信置嘅朋友同海迪講，盛傳老闆黃志祥係想減Thomas人工，兩人傾唔掂數，Thomas先拍枱走人。Thomas07年高峯時期年薪曾高達1635萬，仲高過黃志祥；不過近年薪酬大縮水，舊年只得684萬。跳槽走人，真係一啲都唔出奇。瑞銀昨形容，思捷呢位CFO係一個negativesurprise，因為無零售背景，大家明啦！
海迪