恭喜恭喜！雷丁前晚喺英冠主場贏諾定咸森林1:0後，肯定攞到升班資格。佢哋除咗繼05/06球季後再返英超，仲至少有4千萬鎊（約4.94億港元）落袋，真係開心過中六合彩；可惜有人歡喜有人愁，樸茨茅夫都贏波，但來季就九成都係要降落英甲比賽嘞！
前晚英冠fullschedule，由於排第3位嘅韋斯咸作客打和布里斯托城1:1，所以1哥雷丁喺主場，憑利格活奠勝而贏森林1:0後，足足領先韋斯咸8分；家陣得番兩輪聯賽，換言之肯定會排喺前兩位，可以直升英超。
查實雷丁曾經喺05/06球季試過以英冠冠軍身份升班，可惜只係打咗兩季英超就落番去；經過4季努力後，終於再成為英超一員，佢哋班球迷梗係high爆啦，賽後有成萬人衝入草地同球員慶祝，仲將入波功臣利格活拋上半空㖭。
雷丁攞到英超入場券後，至少會執4千萬鎊；而就算咁唔好彩玩一季就要落番英冠，喺之後嗰4季都會有一筆總值4,800萬鎊嘅「撫恤金」，都真係幾和味㗎。雷丁領隊麥達莫話：「舊年5月30日（英冠附決賽輸畀史雲斯）係我人生嘅最低潮，但呢一刻就係我人生最精采嘅時刻。」睇番近季英超，多數直升球隊都唔會得一季貨仔，所以我求大俠都睇好雷丁㗎！
樸茅贏波護級仍危
另外，卡迪夫城喺呢晚都係焦點，事關佢哋後衞赫德臣離門68碼入波，協助球隊以2:0擊退打比郡；家佢哋排第6，多第7位嘅米杜士堡4分，好大機會攞到升班附加賽席位（3至6名）。不過，樸茨茅夫呢晚就苦過苦瓜喇，雖然喺主場贏水晶宮2:1，但排尾4嘅布里斯托城主場打和韋斯咸而搶到寶貴1分，令雙方仲有5分距離；就算樸茅最後兩場贏晒，都要布城攞少過兩分先成功護到級。照咁睇，樸茅應該都可以執定行李落英甲。