每逢黃金周前也會「例炒」的一眾受惠股，今年卻一反常態，到了4月中旬卻仍未有「炒味」，珠寶股更是「越跌越有」。有外資基經理相信，大家不再追捧受惠股，主因是去年比較基數較高，恐怕今年增長會急速放慢。
該基金經理說：「自由行概念炒咗咁多年，好似六福（590）股價，都由4蚊升到40蚊啦，舊年個比較基數仲要係咁高㖭，升咗咁多年，真係好難再好似以前咁升……家咁啱仲要係中國經濟情況變壞緊，屋漏兼逢夜雨。」
另一名外資分析員則較為樂觀。他說：「自由行效應係就係到咗水尾，但我問過幾間珠寶零售公司，佢哋話近排香港店舖啲人流同銷售情況好過3月，今年黃金周唔係睇得咁淡，仲估緊可以keep到雙位數字增長。」
去年5月份香港零售總額按年大增27.8%，主要是受惠於內地旅客消費帶動，期內珠寶手錶銷售類別更勁升約60%。
瑞信唱淡六福周大福
高速增長神話不再，瑞信更「踩多腳」調低六福及周大福（1929）盈利預測。該行以「淘金熱玩完」為題發表報告，指基於預期金價將會繼續下跌，再加上訪港旅客數字持續減少，香港珠寶股盈利有下調風險。
瑞信狠狠地將六福目標「劈半」至17.7元，並將未來3年盈利預測下調7至25%。該行表示，看淡主因是六福就所持黃金作對冲比例、是一眾珠寶股中最少，香港業務所佔比重卻是最高的一家。該行連降六福兩級至「跑輸大市」。