電影《春嬌與志明》內，其貌不揚的Brenda輕而易舉、無驚無險，就得到貌若黃曉明的溫心、富二代，觀眾們拍案叫絕，尤其是女觀眾們，個個像嗑了迷幻藥，不由自主地從心裏面大喊出來：「我信奇蹟能夠發生於愛情，我未來條仔都會係黃曉明。」
電視節目《盛女愛作戰》，樣子還好的參賽者Suki，最後是唯一能勝出，找到位平平實實的男伴，卻惹來網上諸多批評及質疑：「現實中這是不可能的，『真人騷』其實都是假的，都是傳媒製造出來的假象。」
黃曉明會媾妳就信，平實男會媾妳就係假象？呢個係甚麼道理？但細心再想想，其實女性們一向就只相信沒可能發生的事！她們自小就相信童話故事中的王子，總有一天會騎着白馬來到現實城堡迎娶自己，卻不相信隔籬班又呆又笨的悶蛋風紀隊長，可以照顧妳一生，長大後沉迷相信會有台劇、韓劇式的名門富家男主角，排除萬難、犧牲一切，就只為永遠可以跟妳在一起，卻從不相信一個沉實的正經男會愛上妳，會跟妳長廂斯守，究竟為甚麼會有這樣想法？
把這個問題問一位女士，她說：「黃曉明係無可能會媾我，但薯頭悶蛋都係唔會媾我，既然要相信一個大話去滿足自己，我梗係信黃曉明有日會媾我啦！」女士們繼續補充：「情況就等同男士們自瀆時，橫掂都要幻想個對象，你一定諗啲無可能嘅人，好似明星Model港姐咁，你點都唔會諗你女友或者我㗎！」我再問女士其實這種想法係咪好「絕望」，她冷笑了一聲：「你自瀆是絕望，還是享受，其實都係你自己認為，咁梗係覺得係享受會開心好多啦！」
作者Profile
編劇、導演兼電台節目主持，認為「愛情」是沒有工作時的玩意，「工作」是沒有愛情時的必需。
作者：鄒凱光
逢星期三刊出