球證賀斯畀10分！曼聯領隊費格遜畀5分！維拉領隊麥利殊畀0分！最後球證話事，艾舒利楊格呢吓插水滿分，12碼！周日，曼聯靠楊格博番嚟嘅12碼，朗尼操刀開紀錄，最後主場大勝4:0，續領先曼城5分；但楊格嘅行為惹來非議，連費爵爺都話：「佢的確好易跌！」
被寸可參加奧運跳水
7分鐘，楊格喺禁區畀維拉嘅施亞蘭奇勒踢跌，但我求大俠睇真啲，原來係楊格踢落人哋隻腳度自己跌低，擺明插水，但球證賀斯判罰12碼，朗尼主射中鵠。領先後嘅曼聯順風順水，朗尼再入多球，加埋韋碧克同拿尼嘅入波，大勝4:0。
楊格嘅插水令人覺得勝之不武，好似睇直播嘅紐卡素後衞賴恩泰萊好嬲，喺Twitter話：「楊格無恥！佢係英超最大嘅騙子，啲演技誇張成咁！」費爵爺都承認：「近兩星期，佢的確好易跌低，今晚仲跌得有啲誇張同過火，但呢球絕對係12碼。」
楊格插水早有前科，月頭紅魔對昆士柏流浪（QPR），對手嘅沙恩戴利輕輕推佢一吓，就成個跌低，博到12碼；最終靠朗尼射入「極刑」加埋史高斯嘅入波，曼聯贏2:0。
QPR大股東東尼費南迪斯明寸：「睇多幾次慢鏡，我覺得楊格可同戴利一齊參加奧運！」戴利係英國嘅跳水運動員，將出戰倫敦奧運嘅10米高台跳水。睇番之前報道，原來麥利殊早睇得出楊格蠱惑，賽前已經話：「面對曼聯，我會叫球員小心出腳，但有時唔係咁簡單，好似楊格咁，佢越來越『聰明』。」可惜明知係陷阱，維拉最後都要中招！
另外，朗尼要多謝楊格插水，佢先可以梅開二度，家聯賽入到24球，差尹佩斯3球（未計周一戰果）。若果楊格炮製多啲12碼，話唔定朗尼可以後上做埋神射手！
