廁紙股維達（3331）上星期一口氣做咗兩單批股。一邊係大股東李朝旺用22%溢價賣舊股俾策略股東愛生雅（SCA），轉過頭維達就用低價再配發新股來集資。呢單「天與地」配股引起大家好多猜想，證券界通常有以下兩種意見：（一）可能SCA係儍仔，無啦啦高價接貨；（二）或者SCA同李朝旺之間有啲大家唔知道嘅「默契」。
有配股後同維達接觸過嘅朋友仔向海迪暗示，如果你當SCA係普通增持，咁22%溢價係好貴；但如果你將件事睇作係一個控股權嘅轉讓，咁呢個價，就合情合理喎！
李朝旺想賣盤，呢個猜想喺市場上已經傳咗N年。事關當年維達上市前，有行業龍頭想買起佢，但單deal最後搞唔成，老闆又發現自己公司咁值錢，先至決定嚟上市。批股做完之後，維達股價非常硬淨，芬佬滿意，大家似乎冇乜好complain。不過海迪覺得，維達由始至終無講清楚件事，任由呢啲揣測喺市場上發酵，係極之不負責任嘅行為。仲要有人不停向市場暗示呢單deal係「有嘢跟尾」，究竟有咩唔可以講清楚，要咁樣傳來傳去？
海迪