蘋機會：玩具DC扮110菲林　起渣先有Feel

有時拍攝所追求嘅，未必要細緻到連毛孔都清晰易見；想靚，倒不如將「多餘」東西收起，藉以拍出一種屬於自己嘅獨特風格。日系潮拍王Superheadz，新推出一款回歸110菲林味嘅玩具相機，將那些年懷舊特色融入數碼照片，今天品嚐，居然有另一番體會。

記者：陳國輝
攝影：伍慶泉
Model：Shiya@GME淘女郎

懷舊110菲林感覺

今天對「靚機」定義，包含高清晰度、高速拍攝等要求。老實講，Harinezumi3肯定屬「三低」之作，好似像素只得300萬，相片放大啲已經爆晒格，而「光學」取景器更公然用一個四方膠框便草草了事，玩具味道濃烈，若考慮買專業相機，必然Out出局。
然而，想追求N年前110菲林嗰種懷舊感覺，Harinezumi3就勝任有餘。唔係話一張普通發黃照片咁簡單，經鏡頭拍攝後，無論室內、室外等影像均嚴重佈滿雜訊，而Under陽光底下，更別妄想要求有清晰輪廓；簡單嚟講，Harinezumi3採用極Low-end嘅器材規格，藉此模擬出那些年嘅感覺，的骰得可放在小巧手袋，隨手即拍、生活化地留影，感覺是如此樸實。

■體積小如玩具，單手操作比雙手更輕鬆。

■取景器就係呢個四方膠框。

■從頂部透視似一個開心嘴形。

強玩不同層次曝光

拎上手係一件輕如無物嘅塑膠影相玩具，難免欠缺多功能集一身嘅賣點。但出到第三代，Harinezumi仍新增幾項小玩意，例如3.5倍數碼變焦，方便你拍攝遠景；而Smoky功能就讓你製造不同程度嘅矇矓效果；但講到最具110菲林感覺，我就認為玩OverExposure最正，皆因佢提供三種唔同層次選擇，例如影室內，你可以揀ExtremelyOver，而烈日當空環境下，就適合選擇以Normal或Over模式嚟拍攝，加啲創意，Low-end機一樣拍出生命色彩。