高位派貨喺股票市場常見，唔少新股都係谷靚盤數後上市見光死，跌到攤攤腰跣親股民。足球場上，去到季尾，死戰階段，戰事太頻，真輸假贏係常事，賽績派、賠率派當心中伏；今天向心正雄嘅樸茨茅夫潑冷水，撐作客到南部嘅水晶宮不敗而回。
硬橋硬馬嘅英冠從來係我杯茶，同英超風格唔同，身邊唔少人都同意，近期英冠嘅直播波刺激媲美英超。梗係啦，睇番有韋斯咸和伯明翰3:3後，可以剛戰大炒白禮頓6粒、又有榜首戰雷丁清脆3:1擊倒修咸頓奪「1哥」位，知心友看過都知其實場場波都幾精采，水準拍得住英超下游戰。
今晚英冠全部12場波為公平起見一律深夜凌晨同時開賽；重心反而想打落水狗博樸茅失分，確認降落甲組。財困樸茅近期間歇打出驚人戰意圖續命；上仗作客唐卡士打，一開波輸兩粒，但年輕領隊打死罷就，上半場中段換入前鋒傑臣全攻，結果神奇地完場前反勝4:3，送對手早一步降班。樸軍要餘下3仗全勝才有價講（同日主場迎韋斯咸嘅尾4布里斯托城，只要喺今屆餘下3戰多奪3分，樸軍已肯定降班）。樸茅近兩戰主場已連敗給實力平凡球隊，莊家今場開出主W得1.72倍，有高位派貨叫人追寶尾格；但個人認為人丁單薄嘅樸軍上仗勝來耗力過巨，賠率熱得過份，踢風流波嘅水晶宮今季作客試過一連5場開和，壓力全無，搶分不難。
熱選捧雷丁乘勢炒森林保「1哥」位，雷丁上仗贏修咸頓顯大超班本色，小弟也看錯了，奪冠前勁勢冇理由突然停步；對手森林經一輪搶分已坐穩船，雷丁單W無肉食，[-1]才值博，追寶尾也要有值博率。
下次見報(28/4)
蘋果波神
今日重心推介
熱選
水晶宮勝[+1]（1.92）
冷選
雷丁勝[-1]（2.3）