馮仁昭四圍超：一代宗師年底出關 - 馮仁昭

王家衞執導、梁朝偉、章子怡、趙本山、張震、宋慧喬同小瀋陽等明星主演嘅《一代宗師》，由籌備到拍攝，足足用咗10年時間，正式投入拍攝都超過三年，但部戲到家仲未拍完，遲啲仲要去廣州補戲，難怪內地網民都講笑話部戲改咗名做《一代失蹤》。

發師徒合照

由甄子丹主演嘅《葉問3》年底都會開拍，應該點都會畀到啲壓力王家衞，所以噚日澤東公司終於開出期票，話《一代宗師》鐵定喺12月18日上映，同期上映嘅電影仲有成龍嘅《十二生肖》、周星馳執導嘅《除魔傳奇》、周潤發主演嘅《大上海》同埋陳可辛監製嘅《血滴子》，到時咁多大片撞埋一齊，真係唔知鹿死誰手。
《一》片噚日又發咗一張梁朝偉版嘅葉問師徒合照，照片中嘅偉仔着黑色長衫，坐喺一班徒弟中間。官方微博仲搞咗個叫「一句話創意搶宗師帖」嘅活動，將片方精心設計嘅1,218張宗師帖送畀觀眾，澤東公司仲會喺宗師帖入面揀啲嚟做限量版郵票，但只限喺內地發售。