衞生防護中心公布，今年四個月內共錄得66宗流感死亡個案，比去年同期增加了94%。傳染病專家分析，今年的流感「好狼好惡」，陰濕攞命。
特別留意這報告，沒想到流感「死得人多」，我和身邊朋友也中招（或傳染），幸好只是重感冒，病了一段日子，終於好過來。
日日戒口餐餐食粥，這天連快餐亦格外美味。快餐店都有焗飯，大路貨，美心、大快活很一般，大家樂好少少。我們要點「健儀姐焗飯」，支持她寧吃快餐也不受威逼利誘歸邊去飲狼主和頭酒做騷。
「有雞扒飯嗎？」
「有都畀薄熙來老友『百雞王』食晒喇。」
「有牛扒飯嗎？」
「牛扒冇骨噃，冇骨就冇骨氣，無謂食啦。」
「羊扒呢。」
「羊貴吖嘛，假嘅入得唔出得。」
「咁我地想食狼扒飯─」
「有就有，不過好煩，要秋後算帳，家吓未計數住。」
「好嘞叫豬扒飯。」
「梗係啦，豬遍體鱗傷冇力反抗唧，不過身嬌肉貴個心唔黑，厚切啦，冇介紹錯嘅！」